新世界發展（017）第三代掌舵人、執行副主席鄭志剛(Adrian)一向重視個人與企業形象，佢今年又換公關團隊，從香港電訊（6823）挖角請來RitaYip負責公關工作，原本做開嘅MariaCheung目前主要做企業社會責任(CSR)項目。

數數手指，Adrian已經加入新世界近十年，期間轉過兩次公關團隊，一直幫創辦人鄭裕彤嘅關則輝，2011年過檔去恒隆(101)之後，內部調Maria負責所有公關工作。

據聞，Adrian十分重視品牌形象策略，近年多數搵來有市場營銷經驗或懂得brandbuilding嘅人幫手。佢近年就為地產業務定出「TheArtisanalMovement」呢個形象，乜都要同Artisanal拉上關係。

新請番嚟負責對外公關、企業形象工作嘅Rita，聽聞佢以前喺CSL做開品牌策劃，CSL被香港電訊收購後，佢算係幫過「小小超」李澤楷打工一段時間。鄭志剛曾經透露，嚟緊仲要搞多一個新品牌，有晒腹稿咁話㖭，唔知係咪咁，所以要重組團隊嘞。

詳情請留意明日「中環在線」

掌握財經生活資訊，即Like「蘋果ATM」fb專頁啦！
http://fb.com/appledailyatm