上周三（12日）谷草夜賽，賽前已預算亂局場合較多，但當晚第四場大家可值得一睇再睇。

「正本雄心」贏馬，竟可以靠前速領放到底不在話下，閘前票數急劇下跌，贏馬後凱旋門影頭馬相人數多到排三行亦不出奇，皆因當晚該馬主團體於馬場大搞晚晏，早已招待賓客，而馬匹季初憑新鮮感取勝。

奇怪在於排五檔起步，應聲彈出的「赤水神駒」，上季尾於707、753 及790場次均是領放取勝及上名，李寶利亦清楚馬匹性能，何解今仗出閘後選擇捉住而不放頭呢？還要出現多次不必要的向內欄張望。

騎師賽後解釋一大篇，主要都是根據策騎指示，預定兩種賽事情景而再作陣上部署，又話聽到內側「超能量」騎師呼叫。

當然呼叫啦！事關步速太過慢，「超能量」亦韁口較難操控，主要是由「赤水神駒」造成。

雖則小組的確有行動，但最後只是普通一則警告，對於馬匹陣上發揮的連貫性，及騎師阻嚇性不大，所以現時不停出現步速形勢難測的情況！

如賽後報告解釋「赤水神駒」因賽前缺課影響狀態及前速的話，心裏還能接受！

季內舉行過三場沙田1000米直路賽，數據顯示排1檔非冠即位，而該三場頭馬皆是排內檔起步，今次（22日）使用全闊A跑道，看這數據會否延續下去。

第八場三班1000米，留意「電玩皇者」曾於暑假期間接受閹割手術，但排位體重竟然比上季沒有大幅下跌，屬罕見情況。

埋門試大閘加眼罩猶有餘勁，表現有進，來港前跑四戰直路賽累積三冠一季，季內初出已可留意！