英基幼稚園發生企圖綁架案，圈中星爸媽表示會提高警覺，以防子女受到不必要的傷害。

徐淑敏：老公好想安排囡囡學吓功夫自衞，我哋都留意到綁架事件，不過我哋唔太擔心，因為奶奶負責接送，佢好醒目，我都有教吓囡囡防陌生人，教佢遇到壞人要大聲尖叫。

黎淑賢：我日日都管接管送，始終交畀工人唔放心，寧願自己跟足啲。我自細都同囝囝灌輸拐子佬古仔，教佢提高警覺。

鄧梓峯：我幾個細路都大個，生得又高過我，佢哋識得自己小心啲，識自我保護。

陳琪：校方同家長都會再加強保安，我同老公會輪流接囡囡，唔放心交畀工人，我有同囡囡講呢啲情況，但佢太細未必好識，所以家長自己要做足啲。

王書麒：我哋會同囝囝一齊睇呢啲新聞，等佢自幼就有呢套概念，避免同陌生人接觸，我哋有時間就會去接放學，加上佢學校嘅安全守則亦好完善，暫時我哋都唔太擔心。