【收市閒情】當「實Q」比「警察」更可信(千頌C)
保安收市閒情千頌C
上星期四有防暴想強闖坑口安寧花園,一個年過70嘅保安,一夫當關,趕走防暴。
「我在視察後感到非常痛心,無論是香港國際機場或是香港的鐵路系統,都是香港的命脈。」經過三個月嘅運動,死嘅死,傷嘅傷,林鄭都冇為過一滴血覺得痛心,反而一部閘機而黯然神傷,喂,阿姐,唔好為叫同個「習」字同音,就條件反射交晒戲?
閘機是死,人是生。同樣充當防線角色,我會更珍惜某一批有血有肉有人性嘅保安。話說屋企樓下保安,平時都係煩膠搲水吹嗰隻,個人冇咩點,係煩膠啲。即係你樓下撞到佢時:
夜咗返佢會話「今日咁夜啊!」,你可以點應,都係「係啊…夜咗。」
早咗出門口佢又話「返工啊?」,心諗,唔通收工咩,但虛偽嘅我當然會禮貌講,「係啊,返工啊。(微笑)」
有時佢多嘢講到一個點,以前曾擔心,佢會唔會走去同我阿媽通風報信,「今日有男仔送佢返屋企呀。」「你個女噚晚飲醉酒喎!」
不過最近一次經歷,令我對呢位保安叔叔有啲歉意。話說,有日遊行返歸,著住黑色衫,返到去又見到佢,心諗,呢度深藍屋苑,希望你唔好大大聲講,「你去完遊行啊?」點知,係我小人之心度君子之腹,當日佢一反常態,一言不發,衝去幫我哋撳定𨋢門,等我入𨋢先講一句「辛苦啦,早啲返屋企。」
過去三個月,有唔少保安盡忠職守,上星期四有防暴想強闖坑口安寧花園,一個年過70嘅保安,一夫當關,趕走防暴。你幻想吓,佢除咗件制服,其實只係一個阿伯,而佢就擋一班荷槍實彈嘅防暴,保護居民,係型到值得未到新年都畀利是佢!
7月底,中環IFC職員,又係對於住一批防暴,霸氣一句「話番畀你哋指揮官聽,我哋唔歡迎你入嚟商場。」轉身就走,而克警就面懵離開,成功令呢個商場避過一劫。
數到7月中,當日防暴想衝入沙田中心,有保安引路帶市民離開,亦有保安員即使身負腳傷,都堅持企喺商場外擋住防暴。
的確,請到一個一眼關七,盡忠職守,必要時可以做埋住客、市民哨兵嘅保安,係真係令人安心過保心安。所以,如果你有幸遇到好實Q,就不妨多多表揚;遇到唔好?做吳三桂嘅…?仲講新年唔派利是?炒咗佢啦!(如果你有權炒佢)。
畢竟,今時今日,保安某程度上可信過所謂警察,因為保安有冇盡責,係賞罰有度;但克警呢?做任何事,都冇後果。