「就算我哋要扑嘢（做愛），都搵唔到房去扑，呢個係好現實嘅問題」......游蕙禎去年喺理工大學舉行論壇爆出呢一句，雖然有人認為講得粗俗，不過呢個又確係反映出香港社會年青人面對嘅問題，除咗係物價急升，仲有就係香港土地問題，新仔出嚟做嘢，人工起薪點個價企得硬過鄧小平講「香港50年不變」。香港新一輩係唔係用自己對手密密做就有將來，唔讀大學又唔得，家境唔好就要借Grant loan，又要養父母俾家用，想負擔埋屋租，真係唔易!做唔到就被標籤為「廢青」、「廢中」!

嚟緊8月上映嘅改編自向西村上春樹網絡小說嘅《西謊極落之太爆太子太空艙》就正正講緊港人最切身嘅土地問題、住屋問題、成家立室、甚至日日有發達嘅夢想，以比劏房更非人道嘅「太空艙」為背景，睇宣傳片感覺好誇，不過諗深一層，香港社會o依家就係咁誇張，演「港男打工仔」嘅周柏豪同有錢女連詩雅拍拖，見未來岳母盧宛茵傾婚事，「上唔到車」岳母俾唔俾個女嫁？

戲中Babyjohn以「浩南哥」古惑仔look打扮，點知古惑仔變晒夕陽行業，失業走去做「愛字頭」，張繼聰演基層「貨Van仔」同女友欣宜冇錢開房，成日周圍搵地方！！

前日《西》片有新預告片，cut咗部分絕密忍笑NG鏡頭出嚟，劇情講張繼聰帶女友欣宜返「太空艙」，當時佢哋情到濃時，翻雲覆雨，NG片講欣宜不滿要同張繼聰迫喺太空艙咁細嘅劏房纏綿，去廁所又遇上阿Bob煮即食麵，阿驄即大講「有味」嘢，叫欣宜珍惜同張繼聰喺細小空間瞓埋一齊嘅撞擊聲，雖然係NG片，但見全部人集體忍笑盡量演落去，反而仲係笑點，全片見佢哋拍咗3 take，Bob同欣宜忍笑忍得好辛苦，反而柏豪表現得好冷靜。

林敏驄形容呢個係「愛恩司坦狹義相對卵」之《磅磅磅磅磅》交響曲，確係相當搞鬼!阿驄接受《蘋果》訪問，笑住話：「拍得好開心，一向都好鍾意俾機會新導演，拍出嚟真係好好，演員又個個都到位，我就唔使講啦，哈哈哈，總之試片都個個睇到拍手掌啦！」