當年今日
關於我們

有碟話碟:《自作自樂II》Demo示範作

蘋果日報 2006/09/24 00:00


歌手A氣沖沖闖進經理人的辦公室,將剛收到的《自作自樂II》怒擲在台上,緊張地說:「點解?點解仲出呢啲嘢㗎?」經理人不慌不忙,輕描淡寫道:「搵錢啫,呢隻由創作人出嘅demo專輯出奇地好賣,好嘢自然繼續出,我都係為公司着想。」歌手A聽罷更是怒不可遏,斗膽向經理人說:「你有冇顧吓歌手感受?知唔知出落去後果有幾嚴重?」經理人深知所指的「嚴重」,但仍故作無知。「畀人知道寫歌嘅唱得好過我哋好大鑊㗎,而且啲demo完成度好高,幾乎可以直接出街,咁即係踩過界啫?」經理人本來依舊紋風不動,但終忍不住說:「你明白,創作人寫歌冇可能再用五線譜,一來老闆唔識睇,二來你班大帝基本樂理都唔識,淨識唱K,demo自然愈做愈……」歌手A情緒失控,大嗌一聲後衝出辦公室,經理人沒有追,安坐大班椅暗自冷笑。
消息幾日後由唱片公司的八卦圈傳到電台,聞訊的DJ差點笑爆嘴。口不擇言的DJ甲在茶水間遇上DJ乙,開始為事件加鹽加醋。DJ甲:「哈哈,歌手喎,我驚將來播佢啲歌會忍唔住onair笑出嚟,哈哈。」
DJ乙:「咁又係hurt啲,但好多創作人都唱得好好。方皓玟自填自唱嘅《勞絲萊絲》好又有感染力,演出非常自然,風格同何韻詩嘅《勞斯萊斯》好唔同。」
DJ甲:「陳奐仁首《RoadRunner》同楊毅唱嘅《毅進計劃》夠過癮啦,兩首歌分別變成鄭融嘅《愛得耐》同《紅花會》,佢明顯令首歌增值,《毅進計劃》本來係首趣怪嘅勵志歌,重新填詞後變得好潮,兩首歌各有特色。」
DJ乙:「張佳添首《白天與白痴》先犀利,直頭係二號古巨基。」
DJ甲:「你新入行㗎?張佳添以前係90年代本地樂隊BlackBox主音,後來幫早期基仔做好多歌,所以基仔嘅假音好有BlackBox影子。講犀利,金培達先最堅,佢首《如果愛》唱到A貨張學友咁,係把聲冇咁圓潤咋。」
DJ乙:「VincentChow寫畀陳奕迅嘅《葡萄成熟時》原版《盡頭》都唔差吖,原版歌詞雖然冇Wyman填嘅《葡》咁精采,但聽起上嚟有另一種動人。」
DJ甲:「係歌手A小器啫,隻碟夠有張敬軒寫畀人嘅同人哋寫畀佢嘅歌,流行音樂講交流,有時又互相影響,demo公諸天下冇乜唔妥。近年創作歌手漸成主流,歌手A嘅心態再咁落去,相信好快冇得玩。」
撰文:皇后大盜