「愛兄弟，定愛黃金？」睇怕好多男人都會揀黃金多過兄弟；有財有勢邊個唔想？畀個無謂襟兄弟你就真係多鬼餘。皮笑肉不笑嘅肥龍既然係一個普通男人，自然愛黃金多過兄弟。最近官場傳出風聲，話肥龍暗渡陳倉起煲呔飛腳，點知俾精甩尾嘅煲呔識穿，兩兄弟結果反晒面，當日政改方案一紅一黑嘅好兄弟拍檔，今日各有各搵食，兄弟情真係幾兒戲吖。
肥龍搞咗乜東東，令煲呔同佢擘面？話說當煲呔力推鬍鬚曾上位接CS，等自己有個心腹幫吓手之時，肥龍竟然暗地裏不斷推唐唐、即係煲呔最忌嘅人接捧喎。據聞肥龍喺某個私人飯局中，對於老友拋出嘅幾個CS人選都有彈冇讚，惟獨提到唐唐時就一味唱好，好明顯口味同煲呔好鬼唔同。
各花入各眼，你揀唐唐都冇問題，最弊肥龍表面上又好似撐煲呔咁，同人講過做CS呢，都係公務員好過商界㗎喇，煲呔梗係以為同呢位兄弟意見一致。點知佢咁鬼蠱惑，對外又會推自己最唔like嘅唐唐啫？

政圈啲人收到風，精明如煲呔又點會唔察覺肥龍嘅異動，所以已經同肥龍保持距離，展開面和心不和嘅異常關係。睇睇煲呔競選辦擺位都有玄機啦，最新嘅競選辦秘書長竟然係前區域市政總署署長許雄而唔係陳德霖，政圈中人嘖嘖稱奇，覺得「攞命陳」能力點都好過許雄啩，點解冇得冧莊？咪就係因為佢係肥龍嘅人之嘛。
咁仲唔止，煲呔搵米老鼠老婆黃麗君做競選辦傳媒事務主管，昅實肥龍另一愛將游淑儀，就知煲呔對肥龍幾唔放心啦。據聞肥龍最近仲推薦過新聞秘書Heidi關接替何安達做特首辦新聞統籌專員㖭，但係煲呔梗係扑低咗佢啦。
肥龍為乜要挺唐棄曾？據聞肥龍最想他日辭官歸故里時，仍然喺政府保持一定影響力，所以就捧唐唐做CS，希望唐唐可以幫到手。無端端做咗煲呔同肥龍擘面嘅第三者，唐唐唔使俾人拉去浸豬籠啩？