由河正宇、車太鉉、朱智勛等人主演嘅韓國賣座電影《與神同行》，下集《與神同行：終極審判》落實將於8月9日喺香港上映，電影公司今日公開新海報，再續地獄使者熱潮。

《與神同行：終極審判》以更奇幻情節、更磅礴特效，以及更強演員陣容重現地獄之旅，下集除咗繼續有河正宇、朱智勛及金香起飾演嘅地獄三使者外，更有《屍殺列車》男星馬東石飾演嘅成造神，而上集埋下嘅前世今生伏線，今集亦將一一解開。

下集講述地獄三使者引渡千年最後一個貴人金秀鴻（金東旭飾），展開七七四十九日審判，準備四人一齊投胎轉世之際，鎮守家宅嘅成造神為搶救爺爺亡魂，不惜挑戰一切規則，翻轉人間，觸怒閻羅王（李政宰飾）。地獄三使者為重整人間秩序，一方面帶領金秀鴻繼續地獄審判，另一方面於人間與成造神正面交鋒，更意外驚醒所有人嘅前世記憶，因果迴旋之下，各大神祇將於49日狹路重逢，迎戰終極審判......

更多韓流，喺晒《娛果》
http://fb.com/appledailyent