飲食人誌:
《四葉草》演員帶你搵食肥膏豐厚軟殼蟹
正所謂「後生可畏」,我哋喺一班年輕偶像身上絕對睇到:個個晚晚瞓得幾粒鐘,所到之處,無論喺影樓、訪問定拍攝場地,飯盒、零食滿地,但依然神清氣爽、窈窕輕盈;我哋呢班食件餅都要做Sit-Up補數嘅老餅實在恨唔嚟。咁擦得,一於等呢班《四葉草》演員做我哋導遊,介紹幾個至愛菜式,等我哋黐下啲青春氣息都好吖!
記者:陳慧敏 攝影:梁細權、林栢鈞、楊錦文
逢星期一至日出版
不可思議大食積
做藝人,拍劇趕宣傳,太餓、食得太飽都不適宜。所以一出道,就喺同秋生拍嘅可樂廣告中露兩點嘅阿Don(李逸朗)就話:「我每餐食兩個飯盒,七分飽就夠喇!」保母無奈地插口話佢乜都食一餐,去到塞班島拍劇時,見到任何「地道小食」都逃唔過佢嘅黑洞胃。「我哋食咗個香蕉糕,重有好多我哋連個名都讀唔出嘅小食,發現原來又係香港嘅糭呀、年糕呀咁,冇乜特別,重冇香港嘅咁好食㖭,好失望呀。」
最愛日本菜
軟殼蟹一埋枱,阿Don:「好香蟹味呀!」原來阿Don特別鍾情日本菜,貪其賣相靚,變化多,一次可以食好多款食到飽咁話。「我最鍾意係食刺身,尤其係吞拿魚腩刺身,好香㗎(講到咬唇㖭)!」怪唔得坐喺新裝修嘅「壽司亭」入面,講緊其撚手菜「雜錦米粉」(即係將雪櫃所有餸丟晒落鍋)嘅佢,都不時會睥住碟吞拿魚腩刺身,最後唔聲唔聲,一口氣清佢袋啦!
軟殼蟹$48
雖然吞拿魚腩至係阿Don嘅最愛,但呢隻日本空運軟殼蟹,炸到脆卜卜唔在講,裏面嘅肥膏依然豐厚,鮮甜與爽口嘅感覺同時喺口中蔓延,成為阿Don第一碟試食菜。
牛肉香葱燒$45
切到透光嘅牛肉片選自西冷牛肉中間一段,一啲肥筋都冇。燒嘅時候要溫柔,蘸啲醬油,「吊」住塊牛肉喺鍋上面燙兩燙就夠喇,煮太耐一來易燶易黐底,二來冇晒牛肉同葱嘅香味喇!
壽司亭
地址:太古康怡廣場北座M樓
電話:25136613
營業時間:11:30am-12:00mn
天龍卷$68
吉列大蝦做嘅壽司卷面頭用牛油果包住,賣相非常吸引。要食得出牛油果同蝦嘅甜味,最好就唔好蘸醬料,不過就略嫌淡味咗啲,所以最好第一碟先食,免得畀其他菜式嘅味道蓋過。
吞拿魚腩$85
堪稱全港最平吞拿魚腩,魚腩上嘅油脂好似雪花咁分布喺魚肉表面,口感腴肥真係入口即溶,阿Don最快剷清。
帶子黃金燒$45
有啲西式甜點嘅風味。來自北海道嘅鮮帶子,用麫豉同糖做調味,撒上麫包糠再焗,帶子仍然軟滑多汁,甜絲絲腥味全無,食咗好開胃。
年輕偶像最愛食乜
天佑愛鋸扒
傾落先知,原來Shine兩位大男孩都是牛肉癡,天佑最鍾意尖沙嘴HairCultureCafe嘅鎮店牛扒,「我最鍾意佢哋個燒汁,好香好惹味。我一有時間就會去幫襯㗎喇!」
HairCultureCafe
地址:尖沙嘴亞士厘道9-11號地下
電話:23178881
營業時間:星期一至六11:30am-2:00am;星期日及公眾假期1:00pm-1:00am
黑椒肉眼扒$88/套餐$98
燒新西蘭鮮牛柳,肉質鮮味軟熟,不費吹灰之力就切得開,加埋天佑最愛嘅秘製燒汁,惹味非常。
又南推介牛肉卷
而銅鑼灣有馬嘅燒金菇牛肉卷就係又南最愛:「望住佢(廚師)喺你面前塊鐵板度燒牛肉,『渣渣聲』咁,嘩!真係睇到口水都流埋!而且呢度係我Daddy帶我去食嘅,有感情嘛!」
有馬日本料理
地址:銅鑼灣百德新街57號海華大廈地下
電話:25771050
營業時間:12:00nn-3:00pm;6:00pm-11:30pm
燒金菇牛肉卷$70
有馬最出名就係食牛肉,採用上等美國牛肉,同金菇鮮味混為一體爽夾滑。牛肉三成熟絕對係頂級之選!
2R星洲菜解思鄉
來自新加坡嘅2R當然最愛星洲菜,每次一思鄉就要搵嚟食,蘭桂坊嘅Bamboo就係佢哋嘅最愛。Rosanne:「有一次Race要去拍劇唔得閒落去試食,佢覺得好唔抵,居然前一晚自己走去食咗先㖭呀!」Race:「佢哋炒嘅醬汁真係嚟自馬來西亞,好有新加坡Feel,我哋一思鄉就會去食㗎喇!」
Bamboo
地址:蘭桂坊德己立街21號ThePlaza4樓
電話:28046009
營業時間:12:00nn-2:30pm;6:00pm-11:00pm;星期四至六11:30pmlastorder;星期日休息
檳城湯粉$85
辣味指數得半粒星,石斑塊整得又腍又滑。因為加咗酸子,所以食落酸酸哋,幾醒胃。
馬六甲湯粉$80
馬來西亞菜本來就唔鼓吹勁辣,所以辣味比出面食嘅小兒科,但椰汁及用蝦頭煲嘅湯底香味走晒出嚟!
戴夢夢愛元氣
劇裏面嘅夢夢係個食家,現實中嘅佢就特別偏好元氣壽司:「元氣無論壽司魚生定串燒我都好鍾意,特別係佢秋冬至推出嘅北海道系列!最緊要佢夠方便,梗有一間喺左近嘛!」
元氣壽司
電話:27360019
地址:佐敦彌敦道219號莊士倫敦廣場一樓102-105B舖
營業時間:11:30am-11:30pm
穴子壽司$14(推廣期至12月)
即是海鰻壽司,用日本清酒同醬油烹調,鮮味特別突出!