上星期六本欄講《唔好阻人發達》，你指泛民主派熟悉商戶，要求「領匯」上市前讓步，攞番啲着數，阻頭阻勢。吟，點不知富貴黨竟然搶位神速，比泛民主派更有效率，率先喺十一月二十二日發難，組織全港公屋商戶總會、港九新界屋邨酒樓業商會、香港零售管理協會喺報紙刊登廣告，招待記者，向「領匯」提出三個要求：（一）保障現有租戶優先續租；（二）設立一個例如與物價指數掛鈎，具透明度的合理調整租金機制；（三）給予未能接受新安排的租戶恰當的解約條款。

呢三個條件，分明強人所難。富貴自由黨中人，搞呢次要脅運動嘅如周梁淑怡、方剛、張宇人等與香港最巴閉嘅商場大業主都係老闆階層，明知道上述三項，唔係市場慣例（marketpractice），點解係要講？當然唔係為原則，為民請命，而係為選票，拉攏功能界別（零售界、餐飲界）選民，趁呢個政府弱勢好蝦，乘機攞着數。搞商戶反對房委會商場停車場私有化，以地產信託投資基金形式上市，如果由鄭經翰、李永達、梁耀忠、陳婉嫻呢批議員牽頭，大家會預咗佢，與佢地嘅政治形象相符。但由周梁淑怡、張宇人、方剛呢類富有人家帶隊，不禁啼笑皆非，自由黨主席田北俊就係大業主，佢租地方畀人，會唔會諗起上述三項條件呀？真係為選票，乜都肯制呀，皇帝！
據講周梁等人代表嘅商戶，係大型連鎖店、酒樓、馬主，成班老闆都係有錢佬，泛民主派不甘後人，亦要爭選票，會另搞一批所謂家庭式小商店出嚟抗議，動作更加出位。啲商戶如果話要退租，罷市嘅話，不如就等佢地自動鬆人啦，「領匯」從頭嚟過，乾手淨腳，得到嘅租金可能更高，怕冇人租咩！香港股民會更高興㖭。