曼聯債務纏身,咁就惟有辛苦一班麾下球星,要四出幫手「跑數」,促銷《曼聯2010/11賽季全紀錄》DVD。香港站就分咗畀30歲嘅朴智星,呢位話自己喺曼聯時日無多嘅南韓中場,亦要幫手撲水,聽日下午兩點半帶埋冠軍獎盃現身中環HMV,幫300位預訂咗DVD嘅球迷簽名,簽名後佢當晚就走,想見「三肺星」一面嘅球迷,到時去嗰度碰碰運氣。
其實今次想見「三肺星」一啲都唔貴,港版DVD只售129蚊,比英國版19.9英鎊(約250港元)平一半,香港HMV話以星仔簽名會預售DVD嘅反應算唔錯,由上周四開始到噚日,已經賣出八成。都係嘅,朴智星話晒都喺曼聯唯一一個亞洲球員,點都有D亞洲粉絲,派佢嚟香港促銷都有道理。留港唔夠24個鐘嘅朴智星,當晚會飛走,到上海同北京繼續促銷DVD,真係辛苦晒喇。
星仔對上一次嚟港已經喺05年隨紅魔出征亞洲之旅,轉眼間事隔6年,由於佢同紅魔嘅合約下季就屆滿,唔怪得佢近排放風話同曼聯嘅賓主關係去到倒數階段;單係呢句,相信都有唔少紅魔躉去見佢「最後一面」。
近年參與唔少足球慈善活動嘅星仔,聽朝到港後十點半會到灣仔君悅酒店開記招,中午到中環HMV幫fans簽名,由於時間太趕,佢只會簽名而唔會合照,fans想偷雞到時要執生,唔係真係冇機會。
講番隻DVD,裏面紀錄咗曼聯喺剛結束嘅英超賽季中,成功爭霸嘅歷程及獨家專訪,除咗星仔,其他球星好似里奧咁,都會被派到世界各地促銷。香港USoccer曼聯網網主小碧話香港曼聯迷已訂咗廿幾隻,佢自己要返工去唔到簽名會,但會去機場碰下運氣。