即將67歲生日嘅韓國女星金喬順，佢曾係70年代嘅人氣演員，不過90年代時已退出演藝圈。日前節目《求救信號Signal》公開金喬順近況，發現昔日嘅人氣女星，已經變成化上誇張妝容嘅婆婆，而且一個人獨居於堆滿垃圾嘅屋內。

金喬順嫁畀在日韓僑、於日本生下獨生女後，如今已經將近67歲，當年佢結婚後退出演藝圈，之後並冇再跟圈中朋友來往，消失近25年。於前晚播出嘅節目中，工作人員前去採訪時，發現金喬順目前獨居，每日以黑色帽、黑色外套、黑色軍靴等全黑打扮現身，配上誇張嘅妝容，於區內嘅快餐店徘徊。

金喬順之後帶工作人員返自己家中拍攝，曝光佢堆滿垃圾、曱甴屍體、腐爛食物嘅屋企，除咗充滿惡臭，環境亦髒亂得非常可怕。

金喬順就向工作人員表示，自己身邊有79位神「守護」，指自己由20年前就「與神同行」，能聽到神嘅說話。

最後於鄰居、義工及清潔公司嘅協助下，20多名人員花咗共48小時打掃金喬順嘅屋企，清出4噸垃圾，清潔公司人員表示呢個份量，等同中小企業公司兩至三個月嘅垃圾量。

節目中，有醫生分析金喬順疑似患有精神分裂，因此有妄想症、幻聽、說話不清楚等症狀。不過金喬順至今仍唔願意接受治療，工作人員試圖跟金喬順嘅家人聯絡，但聯絡唔到對方。節目播出後，唔少韓國觀眾都表示非常心疼金喬順嘅近況。

更多韓流，喺晒《娛果》
http://fb.com/appledailyent