國產疫苗即將火速到埗,食衛局陳局長義不容辭充任推銷員,發言前似乎食咗誠實丸,大方承認新鮮出爐的武肺救星尚在臨床階段,「無論邊度嚟嘅都有機會出現問題」,真令人擔心粉紅色物體怒髮衝冠,立時三刻召她入禮賓府照肺,設計對白呼之欲出:「你個死妹釘吖,家陣叫你同阿爺散貨噃,你咁講究竟算點先,啲人聽到仲敢嚟做白老鼠嘅?」更弊的是,她竟然口沒遮攔慷他人之慨,大大聲話高官們不介意做先頭部隊獻身接種,「帶頭打如果畀到市民信心,我哋一定會咁做㗎」。嘩,呢次大鑊鳥,閣下自己中意捐軀咪捐飽佢囉,點解順手將滿朝文武拉埋落水,無差別把他們擺晒上枱,你教打針驚痛的甲乙丙丁情何以堪?第個都話可以側側膊詐聽唔到,PK繼續PK,十一哥繼續十一,肥婆繼續學跳舞,但年年考第一的黑面王騎虎難下,逼於無奈不能不表態,只好忍住道氣飾演應聲蟲,在面書宣佈任何一款疫苗獲准使用,都會第一時間去打。夾硬監佢打針之餘仲搶佢鋒頭,真係唔死都有排驚。