近期環球股市持續下跌，股民自然無乜心機入市，從上周五港股表現可見，個市一抽升，即有大量沽盤出籠，反映市場信心如何低迷，畀着是在去年，一呼百應之下，大市升勢點會咁短癮。
股市疲弱，直接影響係公司股價下跌，同時亦影響埋上市公司的融資能力。股價低迷，一般上市公司唔多願意低位配股集資，所以早前大市反彈，只係睇得到個別公司大股東配舊股套現，而到咗近排，直頭連三四線股都好少見有配股集資新聞。

配股搵人接貨唔容易

事實上，即使上市公司願意低價配股，以目前之市場氣氛，想搵人接貨都難。公司若真係等錢使，唯一途徑便只有透過供股，向現有股東伸手集資，近期見有類似動作者，包括有力寶系、星光（403）、勤達（1172）、馬斯葛（136）、綠色環球資源（061）、威利（273），以及寶威（024）等，數落真係唔少。
寶威上周五發出通告，建議以公開發售形式，每10股供18股，發行超過20億股，每股供股價0.15元，較股份停牌前有大約55%折讓。是次供股集資淨額2.9億元，將用作一般營運資金，以及未來投資於天然礦產資源及相關業務。以上供股比例絕對唔細，差唔多一股供兩股，以目前之淡市，供股要額外畀錢，不過若唔供，要被大幅攤薄權益，可謂供又死唔供又死。寶威已經算係財政唔太差之股份，同時亦非供股常客，都要大比例供股，睇嚟只有揸住大藍籌先至會較安全。