李紫昕同甄澤權今日喺紅磡出席活動，同家燕姐份屬好友嘅李紫昕，談到對方日前炮轟9歲「小巨肺」譚芷昀（Celine）嘅爸爸譚順生喺「家燕媽媽藝術中心」任教時，疑被撬走藝術中心啲學生（新聞連結： http://bit.ly/2sN8t0c ），李紫昕表示冇聽家燕姐呻過，但就大讚Celine好可愛，有潛質。有冇見過譚爸爸？佢話：「見過，但唔熟悉，佢係一個好錫小朋友嘅爸爸。」不過李紫昕直言未見過向來好脾氣嘅家燕姐嬲到咁。

問到李紫昕有冇遇過呢類情況？佢話：「我未有教學，好多時都係客串，我明白家燕姐心情，我覺得有啲嘢係要溝通。」談及對方收取萬幾蚊天王級學費，李紫昕表示不便評論，亦冇留意譚順生喺1985年唱張學友喺1990年推出嘅《李香蘭》。提到有指譚順生利用個女做「搖錢樹」，李紫昕諗咗好耐，佢話：「真係好難講，始終小朋友有潛質，有一個好嘅栽培係開心嘅，但呢個真係唔識評論，我唔知內情。」

另外，甄澤權透露為大台拍攝新一輯魔法節目，但今次未必會係街頭魔法，佢話：「街頭難做啲，因為四方八面都有觀眾。」佢表示未知上一輯節目拍檔吳若希會唔會復出。