我個客請司機，要求三至五年經驗，月薪$18,000。我幫佢約咗個司機叔叔上去見工，呢位求職者態度好積極，特登請咗全日假，亦熟讀我個客嘅公司背景，我有預感呢單生意會水到渠成。

求職者第一次面試係見HR，雙方言談甚歡，一星期後，HR想約第二次面試，今次面試內容係試車，司機叔叔相當配合，爽快答應兼再同公司請假，結果試車都順利過關，但苦候三星期仍未聞簽約安排，只係HR不斷口頭上話滿意。

一個月過後，HR叫司機叔叔上去見經理，我問係咪會順便簽埋約？HR話唔係，只係經理想睇吓順唔順眼，而且仲有第四輪要見老闆。

我曾經幫好出名嘅國際品牌請營業部經理，月薪$45,000，面試兩輪；另外亦都幫過證劵公司請助理副總裁，月薪$90,000，面試三輪，但未見過月薪$18,000請司機，最少要見四輪，即係個求職者為咗見呢份工最少要請四至五日假。

唔係人工多少嘅問題，而係有冇將心比己，就算求職者係失業賦閒在家，一個職位要經歷四至五輪面試都相當困擾，何況有啲求職者本身有工作在身，你叫佢請咁多日假去見一份工，有冇站喺佢立場去諗呢？

專欄作者簡介：
辦公室日報　聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/