寶哥哥揸fit嘅東亞銀行，啱啱公佈舊年盈利創新高，旋即又獲大馬富豪郭令燦家族增持，令市場對佢間銀號嘅股價滿懷憧憬，揸住23號仔嘅股民都幾happy。八方喺金融圈同社交界聽聞，李家仲有喜事臨門，因為，寶哥哥就嚟又做老爺，大公子李民橋（Adrian）據講最快5月上旬再度小登科，婚禮地點揀咗新加坡，會喺聖淘沙嘅酒店舉行。

八方噚日食晏時間，喺富豪飯堂灣仔福臨門撞見寶哥哥、李民橋同佢嘅未婚妻BonnieKwong及Adrian細佬李民斌；李民橋同前妻羅寶盈所生嘅8歲女兒Adrinne亦有同行。其間，Bonnie拖住Adrinne隻手仔，一家人咁款。到下晝兩點零，李民橋拖住女友同囡囡離開。八方問佢係咪5月結婚，佢笑笑口冇回應，急急腳上車走人。
李民橋05年同鷹君創辦人羅鷹石孫女羅寶盈離婚後，社交界一度傳佢同莊士集團太子女莊家蕙拍拖，甚至傳過婚訊。不過，自佢同據講留學澳洲、曾任空姐同行政人員嘅Bonnie拍拖，兩年以來，佢哋周不時拖住手仔，喺社交場合或友儕聚會中大晒恩愛，亦被記者影到佢哋帶埋Adrinne一齊shopping嘅生活照，仲傳聞佢哋舊年中已低調訂婚。

無獨有偶，李民橋細佬、主管東亞中國業務嘅二公子李民斌（Brian），舊年8月，喺英國寶哥哥當年行禮嘅教堂，迎娶任職高盛、有「星洲金融之花」美譽嘅新加坡籍女友馮靈針（LingLing），之後巡迴響西班牙、香港等地擺酒，最後一站就係喺新娘子老家新加坡。
八方記得，Brian喺倫敦武士橋StPaul'sChurch行禮時，同寶哥哥超friend嘅特首曾蔭權正在放假歐遊，仲同太座畀面出席。唔知今次Adrian再婚，煲呔伉儷會唔會咁啱又喺獅城放假，順便畀面赴會呢？

mailto:[email protected]