【港女幸福金句】女友:陪男友英國睇落雪狂食 人妻:衣帽間我佔咗4/5!
江若琳新婚Anjaylia擺酒
江若琳(Elaine)、 陳嘉寶(Anjaylia)、Aka、杜德智今日去到圓方出席一個醫學美容產品發佈會,杜德智唱歌助慶。
江若琳早前同男友Oscar去咗荷蘭同英國旅行,不忘貼圖晒幸福,佢話:「去曼徹斯特睇球賽同睇落雪,係男朋友人生最想做嘅事,但呢個願望就貴過乜。」
「嗰邊落大雪,好多機都取消,好彩趕到返嚟出席活動。去完旅行肥咗好多,一日食足四、五餐,我哋食量驚人。」順勢造人?江若琳話:「冇呀,我哋好傳統,會按步就班。」可能有意外呢?佢話:「啋!唔好啦!好慌張!」總之唔會秘密結婚,有好事會同大家分享。仲話男友Oscar食極唔肥,皮膚又靚,令佢超羨慕。
Anjaylia新婚後一直工作同埋請親朋戚友食飯,忙得不可開交,佢話:「結婚之後爹哋叫我哋去內地同啲Uncle Auntie食下飯,點知食餐便飯有成十位,好似擺酒。」未來仲有好多飯局,依家忙到渡蜜月都未有時間去。
做咗人妻之後,Anjaylia話:「分別唔係好大,不過喺屋企見到啲廚具有時都會諗係咪要煮下飯,好慶幸唔使面對現實住,都係面對啲化妝袋吸引啲,老公會提我記得有時間就要用的焗爐同埋廚具,都好0架,一應俱全,啲好姊妹已經上過嚟開party幫啲廚具開光,老公煮嘢食好好,呢啲廚具可能第日都係佢用多。」
Anjaylia話依家屋企個衣帽間都好好,裝修完之後老公得五分一空間擺嘢,「其他地方都俾我用晒,真係要多謝我位女室內設計師好貼心。」
江若琳同Anjay都好幸福啊!要繼續Sweet落去!
究竟係杜德偉唔正常 (因為佢不老),定係杜德智太正常?