因為《戇夫成龍》阿旺角色而人氣大升嘅郭晉安，舊年7月同歐倩怡喺廸士尼舉行婚禮之後，多次傳出旺嫂有身孕消息，就算上個月有傳媒影到歐倩怡一身大肚look行街，安仔仍然好口密唔認。
直至噚日，馮仁昭同安仔傾電話時，佢終於承認老婆有喜，安仔語氣好興奮咁話：「老人家話過咗一段時間先至好講，Cindy（歐倩怡）係有咗4個月。」究竟肚裏面個BB係仔定女？安仔就話：「未知！其實都唔係好想知，因為希望到時有驚喜，自己仔女都冇所謂。嚟緊我會返內地拍劇，過年先會返香港，Cindy會留喺香港，到時我外母會照顧佢，但我都會買定啲花膠畀Cindy補吓。」

「我一手包辦」

安仔噚晚出席美麗華酒店舉行嘅活動，在場記者恭喜佢時，佢笑到四萬咁口猛話多謝，話太太預產期係出年4月。之前有傳聞話歐倩怡要人工受孕，究竟佢今次係靠自己定科技？安仔笑笑口話：「今次係我一手包辦，與科技無關。」安仔又話買咗部平治畀老婆揸，起碼安全同穩陣啲喎！