日本女星澤尻英龍華嘅媽咪曾經經營地中海菜餐廳，近日佢首度推出食譜教煮西班牙菜，澤尻都有撐媽咪，書中就有佢哋兩母女嘅合照，澤尻仲抱埋狗狗上鏡。

澤尻本身係混血兒，爸爸係日本人，媽咪係阿爾及利亞裔法國人，澤尻媽咪話嚟到日本生活40年，食譜入面教嘅西班牙料理都係迎合日本人口味嘅菜式，澤尻亦賣口乖話媽咪整嘅餸菜好味到食唔停，佢仲話關於料理方面嘅嘢，點都冇可能超越媽咪。