前日內地股市大熱天之下忽然「打噴嚏」，港股卻仍能若無其事照升400多點，已經令唔少股海「老缸湖」感到疑惑，所以星俠昨日亦都提醒各股友，股海形勢詭異，散戶不妨減磅沽貨。內地股市昨日跌勢未止，港股終於難以獨善其身，大跌523點，收報20375，成交增至936億元，情況不妙。
中移動（941）昨日逆市照升，係藍籌股板塊中表現最佳股份。但換個角度諗，假如中移動昨日跟隨大市下跌，個市又點止跌500幾點咁少，估計跌幅起碼達700點。早前星俠推介短炒中移動，家陣目標價已到，既然大市氣氛已有轉淡迹象，有貨就要適時獲利。

大陸股市表現不濟，好大原因係市場關注人行下半年之適度寬鬆貨幣政策會否有變。貨幣信貸總量快速增長，雖能活絡經濟，但股樓年內升幅亦會引發資產泡沫，箇中有利有弊，當局將如何取捨？若然有關措施有大變化，股海必然會有震盪。
建設銀行（939）管理層接受傳媒訪問時透露，該行下半年將縮減新增貸款規模約70%，以防信貸風險，因上半年貸款飆升得太快，又話有部份貸款無流入實體經濟。
要留心，類似問題其他內銀股亦會一樣面對。
建行昨跌3.2%，收報5.75元，剛好跌抵50日線水平，相信此位不易守得住，可待跌近5.40元買第一注，中線獲利目標7.50元。
方星俠