35歲陳意涵演電影《閨蜜》喺戲中做余文樂女友，近日余文樂告別單身，同台模王棠云(Sarah)結婚，傳係雙喜臨門。原來陳意涵感情亦火速有著落，上年7月佢同髮型師Tom分手，分開第13日後，陳意涵同《16個夏天》導演許富翔撻着。

噚日台灣傳媒喺台北影到陳意涵同男友許富翔一齊返香閨，素顏嘅陳意涵着運動衫扶住架單車，男友似係陪佢做運動，去到樓下，男友負責開門，啪完卡就入去，陳意涵就邊行邊講嘢，睇嚟佢哋展開咗「半同居」生活。

逗留咗40分鐘之後，陳意涵先落樓同助手會合，明顯化咗妝，之後佢哋坐的士到八德路巷弄內民宅試鏡，下午5點幾，佢試完鏡就即刻返去見男友，真係見少一陣都唔得。

陳意涵日前喺大陸被影過同許富翔互動親密，但陳意涵就否認同居，今次又再被台灣傳媒影到一齊返女方家門，台灣《蘋果》向許富翔求證，佢起初不知道被影到，一時之間俾唔到反應，只係答「蛤、嗯」，跟手只係聽笑說「然後呢」算係承認戀情，但佢否認同居，解釋只係拎陳意涵嘅鎖匙，並冇後備鑰匙。