富智康(2038)無論資產及業務,都難以被投資者與母公司鴻海分清楚,雖然之前講過同母公司嘅分別係阿媽做iPhone,自己就做非iPhone手機,自行承認公司係「非蘋果概念股」。之但係今日公司股東會後,富智康主席童文欣「晒冷」所代工的新型智能手機,而其中一部正正是iPhone6plus!
他其後解釋,公司有幫iPhone做金屬外殼供應母公司,但強調「唔係好多」,兼無幫蘋果手機做代工,「係鴻海做唔切iPhone,我哋接咗啲單,減輕對方的工作。」他又指做法雙贏,但未有回應iPhone機款佔公司收入及純利多寡。
至於applewatch雖然未接到訂單,但童文欣認為是受零件供應限制所致,一旦解決,「好難唔會畀我哋做。」不過,他未有表明「我哋」是指鴻海抑或富智康。
另外,他又提到富智康會做手機traded-in及電商服務,並計劃印度開廠。但事實上母公司鴻海亦有同樣計劃。被問到是否與鴻海「完美競爭」時,他表示「邊個做得快,做得好,(業務)就歸邊個。」暗示未來或存在內部競爭。
記者:胡仲邦