【直線要講明】迪高:A米新射手似費托
意甲AC米蘭波圖費蘭度托利斯迪高米基爾施華歐洲足球
今季喺葡超加歐聯入咗21球嘅新晉射手米基爾施華,啱啱由波圖轉投AC米蘭,名宿迪高就對呢位後輩讚口不絕,但推介對方時竟然提A米球迷話令佢諗起費蘭度托利斯,玩嘢咩?
米基爾施華日前落實以3,800萬歐元轉會費變身「紅黑軍團」,迪高有信心呢位射手可以喺A米綻放光茫,但好似就用錯例子,令A米球迷心慌慌。因為迪高竟然話米基爾施華喺禁區內嘅把握能力,令佢諗起費托,雖然佢所指嘅費托,應該係馬體會同利物浦最光輝時期嗰位,但有網民就笑話,如果係由車路士借去A米時期嗰位,咁球會就係倒錢落鹹水海。費托當年只喺A米效力咗半季就被放棄,因為佢踢咗10場意甲,只入得一球。
同時,迪高亦讚施華係一位全能射手,盤、傳、射皆精,但就唔敢開空頭支票,話佢首季至少可以入10球,當然近年睇開意甲嘅球迷,都知呢個聯賽近年唔同咗,經常開大波膽,如果施華只係入到10球,相信球迷同球會都未必會收貨。