「經濟學人」分析，香港民主排名87，在国安法西環全面管治下只跌了12級，還是比強國151排位優勝。不過等到2021年尾，香港受摧殘程度會否直插包尾，PK過緬甸？嗱，唔係「沽空」，香港變腥港，金融空軍唔敢郁，怕隨時被国安法「挾」住破產坐監。這一年由西環英明領導下，從國教洗腦入血的中小學到宣誓唔可以起飛腳的公僕與區議員，已經令人縮窒七呎。再重拳向任勞任怨的抗疫醫護打臉，開放唔識英文者免試入職，廿蚊張瞓住舉手通過，香港人，今鋪真係知驚！

諗起近日有女星帶愛犬睇獸醫，狗牙被硬脫光光致眼盲，冇牙力兼冇眼睇的慘況，與香港人現況如有類同，但不是巧合，是西環駱公上任七把火的政績啊。立會議員冇食藥好配合PK鄧，知法犯法的防暴手段食咗邊隻丸仔？罵孕婦死肥婆是啪邊隻禁藥會咁亢奮呢？指住記者鼻哥大鬧邊個影就拉邊個的差佬，與性侵六個未成年女童的師兄，忠誠勇毅獲西環認證，dirty team落區封街交足愛國清零戲份，眾裏尋他，司法機關由律政司做埋龍門與球證，上訴與封區，同步玩不停，玩到明年的年廿九，到時開盤估吓，香港民主排名跌到乜嘢三位數？大灣區首次獨立上榜，贏香港幾條碧街？