振英辭職去馬，唐唐要提早落場，特首選戰開打，一眾香港市民雖然只係塘邊鶴，但至少有戲睇。兩大陣營備戰階段都幾騎呢，唐營有桃姐范太，先知容永棋及大口林大輝，未入閘已經搞到唐唐似儍仔，真陰功。
有許仕仁做幕後大軍師，當年煲呔選舉「肥龍」都係核心，又有公關猛將Heidi，點會俾班人騎劫唐營選戰。梁營也唔好得去邊，挺梁的香港公信力大報忽然變身英國小報，一連兩日將唐唐緋聞作頭版，唐營中人看得咬牙切齒。中央人士收風表示好擔心今次會變成互相抹黑對手醜陋選舉，似當年美國布殊對杜卡基斯一樣。

假如兩邊陣營以為靠負面宣傳可勝出，就太天真太儍。因為特首選舉唔係普選，即使成功進行人格刺殺對手，又如何？特首選戰本質係「選拔」，唔係選舉。「選」係要大家競爭上崗，但最終決定係上級的「拔」，如果用負面宣傳，內地阿爺難以接受，變成七傷拳，對手受傷，自己亦會重傷。
參考內地省市領導選拔方式，競爭者先要取得認可人士的支持。應用到特區，就係1200名選委。香港與內地選拔最大分別係選委有選舉成份，冇話可以百分百受控，上次泛民便成功取得120個選委席位。
振英要突圍，不能單靠民調優勢，最重要係可以拿到幾多個選委席位，向中央證明自己有能力上崗，佢至少要打下200個議席。一來可確保夠票提名之餘，也要顯示政治實力。
據選委形勢分析，第一界別工商選委唐營佔壓倒優勢，因大孖沙有影響力，是唐營票倉。第二界別專業選委梁營有機會偷雞，因這裏是泛民與建制派廝殺之地，振英一定要訴諸價值信念去爭取中間派專業選委，好似「有競爭先有進步」之類。第三界別工會、漁農、中醫、原政界、宗教等兩大陣營都不佔優，係屬中央鐵票，投向那一邊那一邊就贏，亦係中央選拔的工具所在。
由此分析，振英打下200個選委並不容易，好大程度要靠佢個人選舉工程與選委選舉相結合。
至於唐營不要再信勸退這一套了，內地也要競爭上崗，仲點好意思叫阿爺做醜人勸退對手？從選委勢力分佈而言，唐唐係佔絕對優勢，前提係佢要認真投入打場漂亮選戰，千萬不能像第二屆老董連任那場騎呢Show！
唐唐對振英，就似曼聯對史篤城，曼聯可勝不穩，因史篤城惡打難打，你買邊隊？
添馬男