當年今日
關於我們

  市長少不更事都係阿董好 - 李八方

蘋果日報 2003/10/10 00:00


繼粵港合作之後,又要過一過枱,最新興嘅話題又輪到滬港合作咯喎。民建聯噚日率先出訪上海,同上海市長韓正見面。八方聽到韓正喺會上話,同香港董特首喺兩地合作意見一致,重形容大家係「大老鄉」、「小老鄉」㖭。
大老鄉指嘅係上海,小老鄉就係寧波,原來韓正同老董都係寧波人。不過有高人見完後生可畏嘅韓正之後就慨歎,韓正剛剛四十出頭,就揸弗上海一千三百萬人,香港得六百幾萬人,管香港嘅白頭董已經花甲有六歲!不過之後馬上有人補番句,韓正年富力強,唔係,係少不更事,阿董老朽?又唔係,係經一事長一智,老得「夠經驗」囉。
早排北上訪京嘅政商猛人多到不得了,點知過咗十一黃金周,北上風潮吹咗去上海,除咗民建聯,CY梁振英都帶埋一班專業人士去上海,包括立法會議員劉炳章,CY一抵埗就走去睇京劇!重要係由上海人同香港人合演嘅京劇㖭,因為佢出席嘅係滬港京劇節開幕,玩完後,今日先傾專業服務合作呢啲嚴肅話題。


傳真︰2623-9278
電郵︰[email protected]