農曆年三十晚上映，星皓投資嘅魔幻愛情喜劇大片《西遊記女兒國》，噚晚喺北京國家體育館舉行「勇敢去愛」全球首映禮。老闆王海峰、導演鄭保瑞、聯合出品人黃渤，聯同主演嘅郭富城、馮紹峰、趙麗穎、梁詠琪(GiGi)、羅仲謙、小瀋陽及陳雅麗等亮相。

李榮浩、張靚穎現場演繹主題曲《女兒國》外，劉憲華、郎朗亦即興合奏一曲《女兒情》；星皓仲特別邀請咗著名音樂指揮家胡偉立，同76位中國電影樂團成員演奏《西遊記序曲》。

為咗今次嘅首映，大會喺在兩個月前開始籌備，再用7日時間，搭建全亞洲最大3D激光，全銀幕1.3噸重、有5層樓高嘅巨幕，放映面積超過標準籃球場，連城城都話：「我都係第一次喺咁大個熒幕前睇自己，巨幕加上音效配合得好好，好有意思，好震撼！」GiGi就話：「大銀幕睇我同河神林志玲嘅一段情，自己都忍唔住喊。比我想像中靚好多，仲係靚女，覺得化咁多個鐘頭都值得。」

講到最難忘嘅一幕，GiGi、城城同謙仔都話係水戰場面，謙仔話：「好多場口，我哋都係企喺綠幕前，靠幻想去演戲，冇諗過效果咁豐富。」城城就話：「我哋拍水底戲，大多係用綠幕拍。感激導演鄭保瑞，無論製作同演員嘅處理都好成熟。」