《一念無明》嘅電影黃進，佢喺吳君如手上拎完個「評審團最港大獎」之後，佢又再喺杜琪峯手上一口氣拎埋「最港導演」同「最港電影」兩個獎，黃進喺杜Sir手上拎完獎之後，佢話：「我見到杜生，我真係好想多謝佢。因為講港產片，或者港產電影，其實我…或者同我差唔多年紀嘅，最大嘅港產片營養、啟蒙，係來自杜生銀河映像。

「銀河映像已經不停同我哋示範究竟香港電影能夠點樣精緻得嚟而瘋狂，多變得嚟又有佢嘅風骨喺度，呢個係我由細到大對港產片嘅理解，佢集合咗好多唔同嘅嘢，你估佢唔到得嚟又處處保留住佢嘅風骨。我想喺度多謝呢部戲嘅團隊。呢部戲咁香港嘅原因，係佢講緊香港嘅故事，真係好在地嘅香港人故事。亦都好多謝編劇陳楚珩，戲裡面佢涉獵嘅議題，其實我自己都唔認識。佢帶我哋成個團隊、演員，去嘗試咁樣去睇呢個地方，去挖掘一啲本身我哋都唔善長同理解嘅嘢，再帶觀眾去睇自己呢一個地方。我哋除咗要拍多啲香港電影之外，亦要有多啲咁樣嘅作者，去帶大家用唔同方法去睇呢個地方。多謝大家。」

今次喺第一屆《最港電影大獎》頒獎典禮裡面，黃進一口氣拎咗三個大獎，黃進接受訪問嗰陣話：「呢個頒獎禮真係好好，始終呢度係我哋自己嘅地方，有我哋自己嘅語言，做嘅電影嘅語言同文化，全部都係同一條根，所以特別共鳴！但係呢個講法唔係話表示唔使睇其他地方嘅電影，始終電影係一個藝術。」

問到佢有冇覺得近年外界對港產片嘅關注程度多咗，黃進就話：「係㗎，呢一件係令人覺得好開心嘅事，睇見一班熟悉嘅演員，聽住熟悉嘅聲音，更加有共鳴！」講到下一部電影嘅題材，黃進就話：「都係以香港嘅題材出發，o依家我哋喺度籌備中，有幾個方案喺度諗，可能我哋嘅目光太狹窄，所以暫時都係專注喺香港嘅電影。」

至於會唔會好似《一念》嘅題材咁沉重，黃進就話：「可能會輕鬆啲，但係又唔會係太過輕鬆，會俾一啲想像空間大家去諗！」

Golden Scene Co. Ltd. - Film （高先電影）老闆曾麗芬知道黃進嘅感言，佢就話：「其實開心係我，可以同咁多咁叻新導演合作。而佢哋發掘同創作好多新題材，引起香港觀眾共鳴，同小市民發聲，同小眾發聲。好用心提出問題，話畀觀眾聽。希望多啲新導演係香港，拍多啲香港電影，因為佢哋唔使擔心市場上問題，可以用低成本拍到本土，香港電影，希望佢哋繼續將香港電影發揚光大。」

場地提供：香港東隅

精選娛聞，喺晒《娛果》
http://fb.com/appledailyent