新任通訊事務管理局主席、前律師會會長王桂壎，為人風趣鍾意講笑，舉手投足都有喜感，可能係拜許冠文所賜，皆因呢位冷面笑匠喺聖芳濟書院教書時，做過阿壎嘅班主任，「可能耳濡目染，唔少人都話我似佢」，佢話曾經喺機場撞過許冠文，上前相認，對方相見不相識，「唔知我係乜水」。

「由細到大，我都好多嘢講」，66歲嘅阿壎笑談自己係多嘴仔，自小好奇心極大，「啲玩具玩唔夠15分鐘，就拆散佢睇下裡面有啲乜」。爸爸係小學中文教師，難怪10歲大嘅阿壎已經對宋詞唐詩琅琅上口。佢話當年嘅社會，中文老師人工好低，一家七口靠爸爸嘅薄糧糊口，「五兄弟姐妹中我係大哥，知道冇錢開飯、知道父母為乜成日頂嘴，無形壓力係最大」。

小學已經踩單車送貨幫補家計，細細個已經明白，成績唔好就冇得升學要出嚟做嘢，所以都勤力讀書考入聖芳濟書院。熱血青年鍾意夾band，「我就狂幫人補習儲錢買結他」。讀書唔算勤力直至中四遇到一個她，「發奮圖強連godfather都讚我」。

考入中大讀歷史時有咗新目標，是它不是她－－想要部車風馳電掣，「唔辛苦邊得世間財？當時喺兩間中學part time教書，夜晚就教夜校，每星期都教好幾堂」。77年畢業後喺新法書院正式執教鞭教英文，自爆「我會做埋戲角色扮演」；舉手投足似許冠文，可能真係因為對方做過佢兩年班主任有關，「而佢做戲同教書嘅style其實差唔多」。

之後朋友慫恿下考政府工，同時獲入境處同房署等五部門取錄，但佢最終揀咗理民府做地區事務，同新界村民有唔少「交流」。在職時會學法律知識，例如收地程序等，興趣開始嚟嘞。之後到英國Guildford College讀法律，85年成為英國倫敦大學法學士，佢話留學英國時冇媾女，專心讀書，「啲鬼仔有時都會畀啲奇異眼光，好似覺得：『你哋啲中國人數學叻啫，你就嚟讀法律？』」