彭于晏(Eddie)同余文樂喺02年合作拍偶像劇《愛情白皮書》而成為好友，兩人更傳過緋聞。早前余文樂同「皮帶大王」千金王棠云於澳洲墨爾本結婚，彭于晏都有份出席，佢仲好搞鬼，P圖送祝福，將自己個樣Key上新娘子個頭，網友大讚有創意，亦笑問「男閨密係咪想搶新郎」？

Eddie今日現身沙田馬場舉行國際賽事，透露去完余文樂婚禮就嚟咗香港，佢大讚好友婚禮好玩。問到點解同余文樂合照扁晒咀？問係咪樂仔結婚令佢失戀？Eddie笑答:「不會，很開心看到好兄弟由辛苦到非常成功，再去分享開心。」

有傳余文樂明年6月就做爸爸？Eddie猶豫幾秒後答:「我不知道，你們問他。」將來會否跟BB上契，佢話唔知道，應該好多人搶住做，佢話:「我祝福他，不管甚麼都好。」近期主要是休息同出席派對，早前就跟家人到瑞士玩，並順道參觀製錶工場。至於聖誕節，佢笑指打算扮隻麋鹿，因為自己經常迷路，「麋鹿」與國語發音相近。

此外，鄧鉅明伉儷亦獲邀到埸，鄧太指彭于晏身邊有保鏢，故未能集郵。向來風趣嘅鄧生笑指自己後生時似彭于晏，鄧太即話:「佢想，邊有可能，臉皮非常厚。」早前名下馬匹受傷退出，鄧生有意明年在港投馬，而今次馬匹叫咩名就交畀太太去改，鄧太笑指終於等到，但暫時未有心水名。

更多娛聞，喺晒《娛果》
http://fb.com/appledailyent