胡慧沖Roger喺做旅遊達人之前，原來做過幕後，又拍過電影，而佢嘅處女作就係陳嘉上執導嘅《飛虎》。正所謂一不離二，之後Roger拍過唔少作品，佢話：「拍完呢套之後，有朋友介紹我去拍陳果嗰套《香港製造》，之後又再拍《賭神3之少年賭神》，最後一套係《非常警察》。」

不過佢就話其實當年拍戲都有唔開心嘅回憶，佢話當年拍《賭神3之少年賭神》演菲律賓賭神時：「可能我始終唔係電影出身，有時去到片場，明星坐埋一堆，我一個人又唔知點樣，好記得有一次，嗰陣拍《少年賭神》，我已經自己帶咗支水，但係都會飲晒，所以咪自己走去斟水，點知個阿姐話唔怪之得冇得咁快，連你都走嚟斟！」

嗰一刻Roger即刻不是味兒，仲話感覺勁hurt：「事後我喺個露台諗我究竟係乜嘢？係個乞衣？話晒我喺亞視都係做高級編審，點解我要做啲咁嘅嘢，最後我安慰自己話始終唔係藝人，又唔係一個拍電影嘅人才，做娛樂圈要有好多關係，玩就OK，拍完都冇乜心機，拍完玩過咪算！」

雖然keep住阿Q精神，不過Roger話可能自己啲戲實在太屎，之後已經冇人搵拍戲：「人生做過就算，不在其位，不謀其政，你問我會唔會返轉頭，我諗唔會喇，我個樣可以好兇狠，但係講嘢太斯文，又唔打得又唔惡得，費事令人覺得失望。當然如果將來有啲角色唔係做壞人，可能係做慈父又或者弱智嗰啲，都可以玩吓。」