名人、藝人涉足樓市漸見普遍，過去主要買豪宅，現時都會買屋苑。
市場人士話，前港姐佘詩曼，剛以四百一十萬，買入鴨脷洲深灣軒三座高層七六九呎A單位，呎價五千三。
另一位前港姐吳文忻，差唔多同時用三百幾萬，買入三座兩房單位。
聽講，兩人都係第一次睇樓，重即睇即買。
深灣軒都吸引幾多藝人名人睇樓買樓，藝人做業主有陳曼娜、司馬燕及蔣麗萍，名人有蒙妮妲集團董事長鄭明明及商人朱幼麟等。前亞姐樂蓓都參觀過深灣軒。
美聯物業區域董事吳家棟話，深灣軒除有名人捧場外，其實有唔少外籍客買入自住。

居屋估價失預算
樓價反覆上升，出現銀行估價不足，令買家大失預算，但估價較預期高，買家一樣會失預算，蘭西講嘅係居屋自由市場買賣。
美聯分行經理古文聰話，小西灣富景花園，中層五一五呎兩房單位，四月以百三萬成交（連補地價），因為補價程序要個半月，按三月份補價做參考，以為每呎補一千零六十八蚊，即係五十五萬。
幾日前，業主收到通知，先知估價較預期高，補價金額接近六十四萬，呢筆錢因係由買家負責，突然間要畀多九萬，都幾狼狽。古文聰建議買家，最好預鬆動啲，以免到時失預算。