香港嘅教育制度逼到家長與學生唞唔到氣，家長一邊鬧，一邊積極逼仔女參與呢個遊戲，日操夜操，為去考公開試。身兼青年事務委員會主席嘅華置（127）主席劉鳴煒為咗體驗一下，早前試做DSE嘅通識試卷，仲拍埋片，噚日放上facebook，講試後感。
佢話太耐冇考公開試，想模擬𠵱家中學生考試情景，見佢戴眼鏡、着白裇衫打埋呔，成個學生look，好認真，唔知有冇為佢個package加多兩分。
當年就連「香江第一才子」陶傑做通識卷都唔合格，到底劉鳴煒有幾多分？片中見佢搵人改卷，卷一有79分，卷二有70分，應該有5**同5*，但就冇講搵咗邊位改卷。劉鳴煒試後話，𠵱家佢三十幾歲，經驗多，較易應付試卷，如果去番17歲都可能都唔識，又指社會過份重視考試嘞。