周六西甲早場上演重頭大戰，馬德里體育會主場迎戰西維爾，前者啱啱落實由車路士回購嘅前鋒迪亞高哥斯達（DC）都有嚟捧場。DC要到1月先可以為馬體會落場比賽，但暫時似乎唔需要為進攻擔心，馬體會以2:0擊敗西維爾，延續今季西甲不敗。

兩隊喺賽前分別排喺積分榜第3同第2位，加上都係仲保持聯賽不敗之身，戲碼就夠勁，但講到精采程度就真係辛苦觀眾，兩隊喺上半場加埋連一次中目標嘅射門都冇，馬體會4射0中，西維爾今季好似識守唔識攻咁，開季5場波失1球但只入7球，今場作客馬體會，上半場亦只得一次射門兼完全冇威脅。

好在到下半場可觀程度大增，重新開波唔夠1分鐘就有波入，恩歷克卡拉斯高製造全場第一次中框射門就搞掂。到70分鐘馬體會再下一城，由法國前鋒基沙文建功射成2:0奠勝，打破西維爾不敗身升上聯賽第2位。

馬體會喺今季搬去萬達大都會球場做新主場，勢頭認真唔錯，踢咗兩場全部贏晒，入3球未失過一球。