【MyGut者言】過渡性房屋驗樓直擊(徐家健)
新地過渡性房屋徐家健MyGut者言
繼新世界(17)、恒地(12)、會德豐(20),再有地產商籌建大型過渡性房屋項目。上星期新鴻基地產(16)的執行董事郭基煇宣布,新地與聖公會福利協會在元朗東頭興建的「同心村」,預計在2022年落成後可為1,600個基層家庭提供適切居所。
個個都起過渡性房屋,唔通個個都有心起過渡性房屋咩?驗樓直擊,這個新地第三代口中「很有參考價值的過渡性社會房屋項目」,究竟有甚麼參考價值?根據新地的新聞稿(不是售樓書),同心村有5大特點:(一)位置便利,配套齊備,地盤整齊,落成期短;(二)空間設計,以人為本;(三)市集墟市,社區共融;(四)康建指數,關顧身心;和(五)提升技能,就業支援。唔使詹Sir嘅,即使未有現樓,明眼人都看得出這5大特點其實缺一不可。偏偏,其他發展商早前公布的項目,不是離地鐵站太遠,便是未有學校街市等社區配套。優先聘用居民為同區物管職員的就業支援,更是新地獨有。
女友Babe質疑:「你唔係對過渡性房屋一向有保留嘅咩?點解今次好似幫人賣樓盤廣告咁?」我解釋:「有保留嘅從來都係佢哋嘅成本效益。過渡期太短,成本效益低;過渡期太長,成本效益又係低。除非計劃夠周全,喺本來可以起更多樓嘅地上面起地積比率極低嘅過渡性房屋,變相就係放棄規劃興建可持續單位嘅機會。」她再問:「知道啦,咁新地呢個盤好周全咩?」我再解釋:「5大特點嘅參考價值,就係過渡性房屋都要有周全嘅交通、社區,同就業等配套,而唔係冇心去諗點改善基層家庭嘅生活環境,只趕住成功爭取捐地保平安。」