金像電影《樹大招風》及《迷城》嘅道具領班張偉全，因為管有及藏有道具偽鈔案罪成，噚日被判監四個月緩刑兩年。香港電影工作者總會同香港電影美術學會都分別發聲明，話政府無視實況判罪，會成為「國際笑言」。

不過行政會議成員湯家驊就指電影界用「國際笑話」嚟形容係太誇張，批評業界「自己做嘅嘢最大晒、最重要，唔好同我講社會責任」，仲話法例一直存在，過去有600多宗向金管局申請用道具銀紙，指業界應知情。

湯家驊更以《星球大戰》為例，指該片「都唔會喺太空拍」，認為電影界應運用科技解決問題，「睇大場面Star War拍得好真實㗎！」又指：「法例防止的，是仿鈔實物，拍戲可以用真鈔實物或以電子技術處理，便不用以身試法了。希望大家也上了一課。」(新聞連結： https://bit.ly/2HbYUdY )

原本忙緊舞台劇《夕陽戰士》嘅黃秋生，見到湯家驊此言，結果佢都忍唔住，喺fb發炮：「湯先生教電影人用科技解决問題，仲話『《星戰》都唔喺太空拍啦，咪一樣咁似』。我解釋下啦湯先生，道具鈔係用科技做出嚟嘅，唔係種出嚟或者動物繁殖出嚟嘅。道具鈔亦唔係銀行印出嚟嘅，咪一樣咁似。有假一千蚊唔去解決，搞啲道具鈔。大家諗下，自從上次出現假一千蚊，好多商户唔收一千蚊，大家幾耐冇用過一千蚊？」

之後黃秋生再以WhatsApp回覆《蘋果》補充謂：「《星戰》都要用好多真實嘅道具，科技只係幫助，冇全科技呢回事，起碼暫時冇。湯先生好明顯唔識電影，只係一個觀眾嘅想當然。但係當然亦要尊重佢嘅發表意見嘅權利。如果用呢次道具錢嘅思維模式，《星戰》可以被告洩漏太空軍事機密，以後啲太空船要大大隻寫『道具』兩個字。」

精選娛聞，喺晒《娛果》：
http://fb.com/appledailyent