京東健康（6618）周二掛牌，當日收市後MSCI宣布，將京東健康納入標準指數及大盤指數，並於12月22日正式生效，難怪京東健康上市後股價即狂升。集團為內地最大線上醫療健康平台及線上零售藥房，由內地龍頭電商京東集團（9618）分拆上市，業務性質跟阿里健康（241）相近，都以醫藥電商為主。而阿里健康則背靠強大電商母公司阿里巴巴（9988），喺線上銷售及營銷、技術及流量、支付及物流等方面各有優勢。雖然京東健康截至6月底止的活躍戶達7,250萬，較阿里健康線上自營店年度活躍消費戶6,500萬（截至9月底止）為高，但阿里健康全面運營嘅天貓醫藥平台，年度活躍消費者超過2.5億，後者接觸更廣更闊。

阿里健康已公佈截至9 月底止中期業績，期內收入增74%至71.6億元，毛利率改善至26%；各項運營開支包括履約、銷售及市場推廣開支、行政開支、產品開發開支，分別對收入比率下降。受到收入和毛利高速增長，規模效應及成本優化帶動，半年度經調整後盈利達4.36億元，按年增2.9倍。阿里健康上半年線上零售自營非處方藥（OTC）和處方藥收入佔醫藥自營業務收入超過6成，跟京東健康喺唔同領域中各具優勢，可分別投資兩者，當係分散投資。

京東健康跟阿里健康嘅估值亦反映市場憧憬，市盈率以數百倍計，PE高到離晒地，不如用市銷率（PES）計算會覺得舒服啲。阿里健康現市值約3,363.35億港元，預測年度收入增至166 億元，現價預測PES約20倍。京東健康以噚日收市價計，市值相當於3,508.58億元，預測本年度收入增至190億元，預測PES約18.4倍，京東咁睇平過阿里些少。

不過阿里旗下嘅支付寶已簽約超過3.5萬間醫療機構，包括多間二級跟三級醫院，連接其醫療保險支付服務生態，相信支付寶建立嘅數字醫療卡系統與公立醫院嘅積極合作，可引流至阿里健康醫藥平台，進一步鞏固其市場領先地位。此外，阿里健康亦能受惠於線上處方藥銷售政策開放，可藉政策變現，加上阿里巴巴及天貓成熟電子商務平台嘅協同優勢，令阿里健康成為唔少大行呢個行業嘅首選股，應較京東健康享有更高溢價。

若然京東健康股價持續向上，預期阿里健康亦跟隨上升，甚至獲估值重評調高，中線目標睇30元唔算過份，現價買入，跌穿22.5止蝕。

古天后

-----------------------------

掌握理財智慧 感受生活品味

investMAN全新網頁 優雅登場

-----------------------------

部署退休 輕鬆達至財務自由

點擊即睇《退休理財天書》

-----------------------------

【全球樓行】 Dream House零距離

屬於香港人的移民攻略

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！