華華問過啲評判,佢哋話揀滙豐,係因為銀行承諾會維持有女僱員坐高層個位;仲話呢個做法,令滙豐由香港一間本地銀行,變成環球企業喎。講到咁大咁重要,勝出嘅禮物當然唔小嘢──除咗一個Tiffany送出嘅水晶獎狀,最重要又最實用嘅,就係搵到連卡佛專招呼千金或闊太嘅PersonalStylists,教40位滙豐女職員點扮靚,返工同去玩嘅唔同形象同扮靚方法。
滙豐發言人話,呢次得獎佢哋固然開心又興奮,尤其啲獎品好啱使,有女同事聽到話連卡佛教扮靚,已經好興奮;不過,佢哋仲度緊究竟點分配嗰40個名額,斷估都應該係搞個活動或者遊戲,贏咗至有份,總之要公平公正咁揀人。
華華睇番佢哋嘅資料,上年嘅資深管理層當中,有17%係女性,而中級管理層都有三成,咁個活動肯定爭崩頭喇。