小弟向來都唔信數據，唔鍾意睇球隊近況嚟去分析賽事，全憑第六感估波！不過，呢期有啲球隊又真係不得不留意一下近況，因為波動實在太大，不得不提醒各位球迷！
這個星期，實在令我深受打擊，阿仙奴竟然作客贏曼聯兼開齋，鬼！羅馬近況佳，主場無啦啦輸俾國米，鬼！馬體會作客都識贏波，鬼！維拉利爾到𠵱家仲係零入球，變成漏水潛艇，鬼上加鬼！總之，呢兩周嘅球賽，真係令本人摸不着頭顱腦。睇唔通，各位球迷一齊摸住石頭過河啦！

曼聯底牌已露

下周有歐冠盃賽事，實有幾隊波喺聯賽會失分，呢個係歐冠盃前嘅定理！咁究竟曼聯、阿仙奴、車路士，定係皇馬、巴塞會失分呢？我會覺得曼聯氣數已盡！兵源不足下，加上一個表演慾兼夾超獨食嘅C朗，隨時輸波收場。曼聯已經露咗底牌，再唔諗諗個中場，想有好成績就好難囉！
至於聽晚，西甲有幾場大家一定唔可以睇漏眼，首選切爾達返到主場，我好有信心！而拉科上場有不俗表現，今晚要睇睇佢哋作客得唔得！
至於上屆雙料冠軍巴塞，今屆佢哋嘅頭號勁敵，將會係我嘅愛隊華倫西亞，原本係場最強對最強嘅戲碼；可惜大家都有後顧之憂，兩隊都會就住嚟踢，和波好正路！
周鵬
商業1台《球迷集中贏》主持
電郵：[email protected]