當年今日

  賭王做灰姑娘迎過江龍 - 李八方

蘋果日報 2006/09/04 00:00


澳門開放賭權,馬交三分天下。賭王何鴻燊旗下嘅澳博同美國過江龍金沙鬥到難分難解之際,第三勢力永利又鐵定喺後日加入戰圈,佢哋喺澳門開嘅第一間賭場終於開幕,睇怕到時又有另一番惡鬥,濠江賭業,肯定好睇過三國時代嘅魏蜀吳。
日前首先出招大送叉燒飯搶客嘅地頭蟲何鴻燊,無懼外國勢力,噚日悠悠閒去睇芭蕾舞表演,佢仲好定咁話:「邊個有本事淘汰我?」
一向健談嘅賭王,噚日去睇騷時被在場記者問到澳博送叉燒飯嘅成效,佢笑笑口話送叉燒飯呢個噱頭幾吸引、幾收得,頭一日已經送出500幾客,噚日更加送出過千客。佢話會繼續諗吓有啲乜嘢着數嘢,吸引多啲客仔。
提起現時澳門賭業競爭,賭王話老早預見得到,果然一貫沙塵本色。佢話有競爭自然有影響,只盼同業係和平競爭、唔係惡鬥,最重要係大家都有飯食。但係提到金沙,賭王咁老練都有少少勞氣,話全澳門淨係得佢自己投資開學校培訓博彩業人才,金沙就一味以本傷人,用高價將佢培訓嘅精銳伙記挖走,根本同惡鬥無分別。
要鏵哥限制賭場數目
至於被競爭對手批評管理過時、遲早被淘汰,賭王就再次還擊,「啲過江龍點計都要尊重吓啲地頭蟲」,佢喺呢行做咗40幾年、最有經驗就係佢,直情諗都未諗過會俾人淘汰,佢仲諷刺對手無本事淘汰佢咁話。不過,賭王就認為澳門特首鏵哥,應該限制當地賭場、賭枱同老虎機嘅數目,唔想太氾濫,搞到無啖好食。
永利開業對澳博同金沙有乜影響,暫時係後話,但係永利都有請賭王聽日傍晚參加佢哋嘅開幕儀式。賭王話永利請嘅人唔多,當正佢老人家係自己友,佢都好樂意出席永利嘅開幕活動,但係賭場定咗喺半夜先開始營業,賭王形容自己係灰姑娘,12點前點都要離開派對,返屋企瞓覺,相信最夜11點就會同主人家講拜拜。大家先禮後兵,灰姑娘最後點還擊過江龍,大家不妨拭目以待,實有好戲睇呢。