每逢過時過節,家家戶戶都忙於買各式各樣嘅應節食品,或者計劃同家人一齊食飯慶祝,但唔少獨居老弱同大使講,過節都係同平時一樣咁過,冇錢慶祝。
一如往年,蘋果日報慈善基金早喺上個月初展開「蘋果愛心月餅2004」行動,募集善長仁翁捐款,資助非牟利社會服務機構購買月餅送畀貧窮家庭。呢個月二十八號就係中秋節,好多獨居綜援長者同大使呻:「莫講話冇人同我慶祝,就算連自己想買個月餅食應吓節都冇錢呀,一個月餅要三、四十蚊,等於幾日買餸錢,根本花費唔起。」
機構申請創新高
過去幾個禮拜,大使忙於家訪長者之外,又不停接獲機構提出申請,真係接到手軟。話說月餅申請喺上個月尾已經結束,大使發現今年總共有八十間機構提出申請,索取多達三萬二千三百多個月餅,淨係呢兩個數字已經打破「愛心月餅專戶」歷年嘅紀錄。
由於申請機構實在太多,連日來大使都埋首計劃有關安排,預計九月中會個別電話通知機構以及獲贊助月餅嘅數量,請大家耐心等候。
數數手指,以每個月餅慈善價為十五蚊計起,如果要滿足晒所有機構嘅申請,今次起碼要四十八萬幾先夠找數,大使喺度再次呼籲各位善長仁翁慷慨解囊,希望大家在慶祝佳節嘅同時,亦不忘關懷獨居老弱,令佢哋有機會品嘗月餅應節。
「蘋果愛心月餅專戶」捐款編號:C0640
暖流熱線
電話:29908688
傳真:23702192
電郵:[email protected]
網址: http://www.charity.atnext.com