記協主席同執委今個月改選換莊，但唔知係工作太忙定私務纏身，直到6月初執委選舉提名截止期限，只得6個人報名參選，仲差4個人先達到會章最低要求，惟有將提名限期押後到今個星期六6月9號。記協主席胡麗雲身處挪威開國際記者會議，佢話考慮緊係咪冧莊做多屆，暫時唔知邊個行家有興趣坐呢個位。佢同八方講，好多外國記者關注香港回歸後嘅新聞自由有冇受損，所以邊個人做主席冇所謂，最重要有責任心，肯挺身維護新聞、言論同出版自由。03年港府推銷23條時，記協為保障新聞自由發出唔少批評聲音，近呢兩年好似冇乜聲氣，八方希望有心人接棒。