今年北京兩會受關注人物之一，包括澳門中聯辦主任李剛，皆因佢一直未有現身，早前中澳門中聯辦副主任陳斯喜透露，李剛只不過係病咗而缺席！

事隔幾日，傳媒都關注李剛係咪會病癒出席兩會？點知全國人大澳門代表團今朝開會，討論最高人民檢察院檢察長同最高人民法院院長嘅工作報告，李剛卻繼續冇影，自然又惹嚟唔少猜測，皆因兩會喺中國官場好重要㗎，除非係大病啫，一般嚟講，官員係唔敢亦唔會缺席㗎，莫非...唔通....真係...

可能知道坊間眾說紛紜啦，陳斯喜再為李剛缺席解畫，話佢身體「真的沒有大礙」，但卻應醫生要求而喺兩會請假，佢強調，李剛宜家身在澳門㗎，但又表明，李剛連人大會議閉幕都要缺席喎！

明明無大礙又要缺席？外界唔少人質疑：唔係咁簡單啩？陳斯喜都幾了解大家諗法喎，溫馨提示：「大家不要有其他想法！」可惜冇講明佢口中嘅「想法」，係咪坊間嘅同一「想法」。而有啲嘢叫愈描愈黑，唔知陳斯喜明唔明白？