韓國今年壓軸電影《與神同行》後日喺韓國上映，香港則於明年1月11日開畫。今日導演金容華聯同一眾主演包括河正宇、車太鉉、朱智勛、金香起及金東旭喺首爾蠶室SIGNIEL Hotel舉行亞洲傳媒發佈會，並邀得香港、台灣、新加坡、印尼、馬來西亞及菲律賓6個地方傳媒到場採訪。

記者會上，6人一出場即要戴上耳機，方便作即時繙譯之用，不過佢哋就被耳機考起，研究一輪後先懂得戴上。車太鉉早前受訪指兒子已率先欣賞，喺記者會上車太鉉就透露兒子非常喜歡電影，特別是最後嘅戲份更哭着。同時車太鉉更透露今晚VIP首映禮，好友宋仲基同金鐘國都會嚟捧場。

對於拍攝時如何減壓，河正宇笑言吃東西，車太鉉就指同河正宇合作好愉快，導演又一直照顧我，所以完全冇壓力。金香起指拍攝時叔叔們都好照顧自己。導演表示拍攝時難度比較大，盡量努力解決演員們精神壓力是最重要。

拍完電影後會唔會怕落地獄而令到想做人會更加好，河正宇說：「會重新思考人際關係，是否有破壞過人際關係，是否有自私。」車太鉉亦都話一樣有想做更加好嘅人，睇完電影好感動亦受衝擊，好似對父母感情等。導演表示電影令人有不同感受，令大家重新思考自己人生。

至於是否能有信心喺七個地獄審訊順利過關時，車太鉉笑指自己應該一關也過不了，河正宇指自己亦都冇乜信心，但自己認真工作，懶惰地獄個關應該可以順利過關。

由於有台灣傳媒指去年《屍殺列車》在台灣票房創佳績，車太鉉亦希望電影如《屍殺》一樣有好評。電影有好多特技效果，所以導演亦希望亞洲能夠創作一部好過荷李活一樣嘅電影。

更多韓流，喺晒《娛果》
http://fb.com/appledailyent