組合Shine在紅館舉行一連兩場演唱會，前晚揭開序幕，楊千嬅及許志安擔任表演嘉賓。Shine兩位成員之前努力操肌，兩人齊齊除衫騷肌肉，黃又南半裸表演鋼管舞，他說：「我覺得𠵱家就認真去學跳舞，唔通老咗先跳咩！」天佑即笑說：「你驚你條腰老咗郁唔到，男人條腰好緊要。」
徐天佑和女舞蹈員面貼面跳舞，不過唱情歌時，他情深說：「我個人好容易唔開心，直到你出現，有你我就安心，變得好踏實，希望每一日起身睜開眼都係見到你。」雖沒指名道姓，但明顯是說給太太聽。中段唱《陀飛輪》時，又南感觸說：「呢首歌我諗起好多嘢，我爸患腦退化，之前認唔到我同阿媽，有日阿媽打畀我，話阿爸又唔見咗，我通宵搵咗佢幾日，終於搵到佢，嗰刻好開心，呢事令我明白到有啲事唔可以咁執着，要珍惜家人喺身邊嘅日子。」

邊唱邊喊

Shine全晚表現感觸，尾聲時更邊唱邊喊，又南說：「Shine喺十周年時開過一次演唱會，今次十五周年再開，相隔五年都無乜新歌，係觀眾令Shine實現夢想。唔知幾時再見，希望大家記得Shine喺紅館唱過歌。」
到嘉賓安仔出場，天佑說：「呢五、六年喺街見到朋友，佢哋都會話細細個就聽我唱歌，今次我終於可以對住你講，我細細個就聽你唱歌。」千嬅就和Shine合唱《野孩子》，她說：「好欣賞佢哋嘅堅持，呢啲表演非一時三刻做得到。」
採訪：王連連
攝影：仇志德