新地代理出租豪宅SignatureHomes，喺灣仔總部開設「家居概念」寫意廊，提供好似屋企咁舒服嘅聚腳地點，畀尊貴嘅租客，同時作為舉辦座談或興趣班之類活動。
簡單啲講，就係設計成豪宅嘅寫字樓。計我蘭西話，實際用途係提供環境舒適嘅地方，畀租客簽約就真。
聽講，寫意廊花咗六個月及逾五百萬。佢哋重話，歡迎記者上去休息㖭。
不過，蘭西好懷疑，有冇租客咁有閒情上去「聚腳」。至於參加活動，乜新地唔係標榜旗下豪宅會所好多嘢玩嘅咩？使唔使去到咁遠上興趣班？

碧堤球賽造勢
深井碧堤二期即將開賣，利嘉閣噚日與九倉黃光耀喺碧堤會所打網球賽，順便當做宣傳。
黃光耀出咗名係運動健將，網球當然難唔到佢，利記出到雙打陣營，有執董廖偉強同區域董事蔡榮增，都一樣敗陣，最後頒咗個金牌畀黃光耀。
利記兄弟公司中原都趁開盤前積極造勢，將碧堤分行改裝成主題分行，二期其中一個賣點就係露台，中記就喺分行室內，搭個道具露台，配埋家居布置海報，相當逼真。