上星期六先由黑池過檔水晶宮嘅荷路威，認真好腳頭。前晚場英冠係佢首次帶隊比賽，就幫水晶宮喺聯賽大勝來訪嘅葉士域治5:0；而喺呢場連中三元嘅前鋒格連梅利（圖），賽後仲獲得荷路威點名稱讚㖭！由於卡迪夫城同埋米杜士堡齊齊失分，分別輸畀查爾頓4:5、打和諾定咸森林0:0，所以水晶宮喺全取3分之後，家亦上咗榜首。