【蒙面惡法】莊思敏自言「唔了解但支持」 IG跟網民開火撐到行
蘋果日報 2019/10/06 14:58
莊思敏開火負評
四個月的反送中運動，警民爆出嚴重衝突，經濟大受打擊，社會變得撕裂，大馬拿督女莊思敏早前就機場「和你塞」時，看到接機大堂有示威者高舉標語兼大叫口號，希望遊客關注反修例事件。莊思敏其後在社交網上載照片留言︰「冇見過人話愛你但一直唱衰你，唔好再口口聲聲自己好愛香港！你哋冇資格！」以及Hashtag「黑衣人好滋擾」，早前示威者衝擊中聯辦翌日，莊思敏再爆seed︰「好想捉班『打靶』去打靶！」一度惹來負評。
莊思敏近日未有再就社會問題發表「個人偉論」，負評剛得以淡化，上周五首林鄭月娥宣佈會實施《蒙面法》，莊思敏又表態支持：「如果呢條法例係能夠令市面平靜，我絕對支持！我未了解法例嘅內容，相信好多香港市民都希望能夠平靜，希望任何一方都唔好受傷害。」網民馬上再關注她的facebook及Instagram，莊思敏昨日貼出新post時，跟網民再掀罵戰。
穿上黑色連身裙的莊思敏，打扮靚靚為首飾品牌宣傳，她留言︰「心情很不一樣。」有網民即留言：「你個良心去咗邊？你又唔係香港人又唔係中國人。」莊思敏回答：「點解冇？」另有網民翻舊帳斥莊思敏曾揶揄：「『黑衣人好滋擾』、『好想捉班『打靶』去打靶！』咁唔知呢幾句係咪你講呢？」莊思敏說：「我冇話黑衣就係暴徒喎！」網民再不屑說：「要奶共就死去大灣區揾錢。」莊思敏說︰「香港是大灣區內的。」
網民寸爆莊思敏︰「如果警察拉你因為你帶假波你會點？」她回應︰「等法庭審理囉！」有網民又說：「温馨提示：今日唔可以再蒙面啦！。Oh sorry，原來你係整咗容，以為你帶咗面具。」莊思敏竟說︰「Oh！」雖然負評湧出，莊思敏不但未有刪走，還逐一反駁，留言中也有莊思敏的忠粉衝出撐偶像，勸她不要回答，她表示不是粗話都沒所謂。