愛華頓嘅前英格蘭隊長朗尼上星期六喺球隊以2:1擊敗般尼茅夫嘅英超比賽中，上半場同對方後衛西蒙法蘭西斯爭頂頭槌時畀對方手踭鋤爆左眼而血流披面，由於球證並冇吹罰，搞到朗尼鬼咁勞氣。

朗尼經過一段時間治理之後繼續比賽，但到咗完半場前2分鐘佢眼角嘅傷口又再流血，要再次接受治療。完成上半場比賽嘅朗尼，去到55分鐘終於被調離場，由奧馬尼亞斯入替，後者更加梅開二度協助拖肥反勝般茅。雖然受傷嘅朗尼先後經過兩次治療，但愛華頓領隊朗奴高文就話換佢係因為戰術而唔係因為受傷。朗奴高文賽後咁講︰「隊醫半場同我講，話如果傷口再爆開就要換朗尼，而我換佢係因為我哋需要有啲唔同嘅嘢。」